Nagpadayon ang Department of Education (DepEd) sa imbestigasyon sa kamatayon sa usa ka 8-anyos nga batang babayeng Grade 3 student sa Lapulapu Elementary School sa Agdao District, Davao City, human giingong gihampak og notebook sa iyang classmate.
Nagkigkoordinar na ang DepEd Regional Office XI, Schools Division of Davao City ug ang tagdumala sa eskwelahan sa kapulisan ug ubang mga awtoridad aron masuta ang tinuod nga nahitabo.
Naghatag na usab og psychosocial support sa mga naapektuhang estudyante ug school personnel, samtang gipadayon ang child protection ug administrative processes subay sa balaod aron mapanalipdan ang katungod sa nalambigit sa insidente.
Gihangyo usab sa DepEd ang publiko nga likayan ang pagpakaylap og mga wala pa mapamatud-ang impormasyon aron dili maapektuhan ang nagpadayong imbestigasyon.
Sa laing bahin, padayon usab ang imbestigasyon sa Davao City Police Office (DCPO) aron matino ang tinuod nga hinungdan sa kamatayon sa 8-anyos nga bata.Base sa inisyal nga rekord, nahitabo ang insidente kaniadtong Hulyo 17 apan Hulyo 22 na kini naireport sa kapulisan.
Kahinumdoman nga gidala ang bata sa Southern Philippines Medical Center gumikan sa pagpanakit sa ulo niini ayha kini nakabsan sa kinabuhi. Didto nalang nasuta sa CT scan nga aduna diay pagdugo sulod sa ulo sa bata. Sumala sa pasiunang findings sa doktor, ang hinungdan sa kamatayon mao ang brain failure ug traumatic brain injury. Gihulat pa usab ang resulta sa ubang medical examinations.
Sa pagkakaron, wala pa matino sa mga imbestigador kung ang giingong paghampak sa notebook ba maoy direktang hinungdan sa kamatayon o adunay laing hinungdan niini.
Nagdumili ang pamilya sa pagpahigayon og autopsy sa lawas sa bata, busa padayon pang ginalantaw sa mga awtoridad ang tanang posibleng hinungdan sa insidente.
Sa pagkakaron, ang haya sa bata gipahimutang sa ilang pinuy-anan sa Island Garden City of Samal.
