Gihimakak ug gipasabot sa defense team ni Vice President Sara Duterte nga wala mag-walk out ang ilang lead counsel nga si Atty. Sheila Sison atol sa ikaduhang adlaw sa impeachment trial kaniadtong Martes, Hulyo 7, 2026.
Nahitabo ang isyu samtang gitubag ni private prosecutor Atty. Amando Ligutan ang pangutana ni Senator-Judge Risa Hontiveros kung maikonsiderar bang impeachable offense ang giingong grave threats ni VP Sara batok kang Pangulong Ferdinand Marcos Jr., First Lady Liza Marcos, ug kanhing House Speaker o Leyte First District Representative Martin Romualdez.
Gipadayag ni Ligutan nga mura’g naghimo og eksena si Atty. Sison human niya namatikdan nga migawas kini sa session hall. Apan, mibalik dayon si Atty. Sison sa session hall human siya mahisgoti ni Ligutan.
Giklaro ni defense spokesperson Atty. Michael Poa sa usa ka press conference nga wala mag-walk out si Sison kondili miadto lamang kini sa kasilyas.
Dugang si Poa nga normal lamang ang paggawas sa makadiyot atol sa taas nga pagdungog ug giingon nga siya usab makadaghang higayon nga migawas sa maong pagtaral.
Matud pa niya, mibalik dayon si Atty. Sison human niya madungog nga gihisgotan ang iyang ngalan ug gipasabot nga kinahanglan lang siya mopahuway sa kasilyas.
