Gi-aprubahan na sa konseho sa Davao City ang ordinansa nga magtukod og Davao City Government Centralized Data Center aron mahimong sentrong imbakan ug proteksyon sa digital records ug systems sa city government.
Tumong niini nga mahiusa ug mas hapsay ang pagdumala sa data gikan sa nagkalain-laing opisina sa siyudad, samtang mapalig-on ang cybersecurity batok sa hacking, data breaches, system failures ug ubang cyber threats.
Sa pagkakaron, magkabulag ang server rooms ug databases sa daghang city offices.
Pinaagi sa centralized data center, mas mahimong hapsay ang backup, access ug pag-share sa impormasyon tali sa mga opisina, ubos sa angay nga security controls.
Ang City Information Technology Center o CITC maoy manguna sa operasyon ug pagdumala sa pasilidad.
Lakip usab sa plano ang disaster recovery ug backup systems aron mapadayon ang importanteng serbisyo sa gobyerno bisan adunay cyberattack, technical problem o kalamidad.
Matod ni Councilor Bonz Andre Militar, importante ang maong lakang tungod kay nagkadaghan na ang digital government services.
Gilauman nga pinaagi niini, mas mahimong secure, reliable ug future-ready ang digital operations sa Davao City.| VIA BOMBO EROS PAJOTA
