Gikumpirma ni Department of the Interior and Local Government (DILG) Secretary Jonvic Remulla nga nahibalo sila sa nahimutangan ni Vice President Sara Duterte, apan gipili nila nga dili pugson ang pagserbisyo sa warrant of arrest batok kaniya.
Matod sa kalihim, dili maayo nga ang tanang pressure ug stress nga nasinati karon sa Bise Presidente makaapekto sa iyang panglantaw ug pagtan-aw sa sitwasyon.
Dugang pa niya, girespeto sa Philippine National Police (PNP) ang posisyon sa Bise Presidente.
Gisubay sa PNP ang lihok sa Bise Presidente sukad nga gipagawas ang warrant of arrest batok kaniya hangtod nga nakabayad siya og piyansa.
Gipasabot usab ni Remulla nga human magpagawas ang Quezon City Regional Trial Court og warrant of arrest batok sa Bise Presidente, wala nila pugsa ang pagpatuman niini.
Matod pa niya, dokumentado ang matag lihok sa mga awtoridad pinaagi sa body camera, sukad sa paggawas sa warrant of arrest hangtod nga nakapiyansa ang Bise Presidente.
Kahinumduman nga gipahayag ni VP Duterte nga wala siyay pagsalig sa PNP ug sa RTC tungod sa giingong mga hulga batok sa iyang kinabuhi.
Ang kaso batok kaniya naggikan sa iyang pahayag atol sa usa ka online press conference, diin iyang giingon nga adunay siya nakuhang tawo nga mopatay kang President Ferdinand Marcos Jr., First Lady Liza Marcos, ug kanhi House Speaker Martin Romualdez kung siya mapatay.
| via Bombo Ray Ann Martinez
