Gitawag og “ironic” ni House prosecution panel spokesperson ug Lanao del Sur Rep. Zia Alonto Adiong ang pahayag ni Vice President Sara Duterte nga nabalaka siya alang sa iyang kaluwasan ug seguridad sa iyang pamilya.
Matod ni Adiong, dili kuno uyon ang maong pahayag ni Duterte sa iyang kahimtang tungod kay nag-atubang ang bise presidente og tulo ka kaso sa grave threats human sa iyang mga pahayag niadtong 2024 nga aduna siyay nakaistorya nga usa ka tawo aron ipapatay sila ni Pangulong Ferdinand Marcos Jr., First Lady Liza Araneta-Marcos ug kanhi House Speaker Martin Romualdez kung siya mismo ang mapatay.
Nagpiyansa si Duterte og P360,000 niadtong Sabado sa Quezon City court, usa ka adlaw human gipagawas ang arrest warrant batok kaniya.
Sa wala pa mosulod sa Quezon City Hall of Justice, miingon si Duterte nga wala siya’y pagsalig sa kapulisan ug nahadlok siya alang sa iyang seguridad ug sa iyang pamilya.
Miingon usab siya nga sukad pa niadtong 2023, nakasinati na siya og kawad-on sa seguridad tungod sa giingong harassment nga nasinati sa iyang pamilya.
Gikuwestiyon kini ni Adiong ug miingon nga daw siya pa hinuon ang nagpakita nga biktima bisan pa nga siya ang nag-atubang sa kaso nga may kalabotan sa pagpanghulga.
Namatikdan usab sa magbabalaod ang lihok ug mga pulong ni Duterte samtang nakigsulti sa iyang mga abogado, nga matod niya dili daw kini nagpakita sa usa ka tawo nga grabe ang kahadlok alang sa iyang kinabuhi.
Tungod niini, miingon si Adiong nga dili kuno katuohan ang pahayag nga dugay na nga nakadawat og mga hulga si Duterte, ilabi na kay siya mismo ang gikiha tungod sa giingong pagpanghulga batok sa Pangulo ug uban pang mga opisyal.
Apan, dugang pa ni Adiong nga kinahanglan gihapon seryosong imbestigahan ang bisan unsang tinuod nga hulga batok sa bise presidente ug sa iyang pamilya.
Samtang, miingon ang Philippine National Police nga wala kini makadawat og impormasyon o report bahin sa bisan unsang hulga batok kang Duterte ug sa iyang pamilya.
Matod ni PNP Chief PGen. Jose Melencio Nartatez Jr., padayon nga ginamonitor ug ginatan-aw sa kapulisan ang sitwasyon aron masiguro ang seguridad sa bise presidente.
| via Bombo Ray Ann Martinez
