DAVAO CITY – Padayon karon ang pakiglambigit sa mga personahe sa City Health Office (CHO) ngadto sa mga nagkadaiyang barangay sa siyudad aron lamang masulod ang mga hilit nga lugar sa siyudad ug makapahigayon ug rekoreda ngadto sa mga residente kalabot sa kamahinungdanon sa pagpabakuna batok sa covid-19.
Kahinumduman nga daghanan pa karon ang dili kumbinsido nga magpabakuna gawas pa sa mga indibidwal nga mamili ug brand sa covid-19 vaccine hinungdan nga lisud nga makab-ot ang gihandom nga igong proteksiyon batok sa virus pagsulod sa bulan sa Nobyembre.
Kahinumduman nga anaa pa sa kapin 400,000 ka mga indibidwal ang kinahanglan nga bakunahan aron nga maangkon ang herd immunity sa dakbayan.
Sumala pa kang Dr. Michelle Schlosser, Davao City Covid-19 Task Force spokesperson, nga kalakip sab sa ilang gihimo nga lakang karon mao ang pagpahimutang ug mga vaccination site paduol sa mga tawo aron nga dali na lamang ang pag-adto sa mga nahisgutan.
Usa sab sumala pa sa mga suliran nga gi-atubang sa lokal nga kagamhanan mao ang padayon nga pagbabag sa pipila ka mga religious group nga magpabakuna gumikan kay dili pa kumbinsido ang mga nahisgutan sa proteksiyon nga mahatag niini aron nga ma-protektahan ang kaugalingon batok sa kagaw.
Una na sab nga gi-awhag ni Dr. Ricardo Audan, hepe sa Southern Philippines Medical Center (SPMC) ang katawhan nga mahinungdanon ang pagpabakuna gumikan kay sagad sumala pa sa mga madala sa nahisgutan nga balay tambalanan nga natakdan ug covid-19 ang dili pa fully vaccinated.
