Gilimod ni Senate Minority Leader Alan Peter Cayetano nga mihangyo siya og “ceasefire” kang Sen. Panfilo “Ping” Lacson sa ilang panaglalis bahin sa giingong mga “ghost projects” sa Taguig City.
Gipatin-aw ni Cayetano nga ang iyang pahayag tubag kini sa social media post ni Lacson diin miingon kini nga adunay usa ka senador nga kuno “pabulong” nga nangayo og pagtapos sa panag-away, bisan wala kini maghisgot og ngalan.
Nagkanayon si Cayetano nga adunay pipila ka senador nga nagpahayag og kabalaka nga ang ilang pagbinayloay og akusasyon mahimong makadaot sa imahe sa Senado, makapahisalaag sa atensyon gikan sa mas importante nga mga isyu, ug makaapekto sa interes sa publiko.
Gipasiugda sa senador nga mas angay nga tutokan ang dagkong isyu sama sa taas nga presyo sa kuryente ug lana, online gaming, ug vape imbis nga magpabilin sa personal nga panagbingkil.
Dugang pa niini nga andam siyang moatubang sa bisan unsang alegasyon nga ipasaka batok kaniya.
