Nagdeklara og “all-out war” batok sa smuggling ang Bureau of Customs (BoC) ug gipatuman ang hugot nga one-strike policy batok sa mga kawani nga mapamatud-ang nalambigit sa korapsyon.
Matud ni BoC Commissioner Ariel Nepomuceno, ang bag-ohay nga pagkakompiska sa bilyon-bilyong pisong kantidad sa mga kontrabandong sigarilyo maoy pasidaan nga mas pakusgon pa ang kampanya batok sa mga smuggler.
Gipasiugda niya nga magpadayon ang zero tolerance policy sa sulod sa ahensya, ug ang bisan kinsang empleyado nga mapamatud-ang nalambigit sa ilegal nga kalihokan mahimong tangtangon dayon sa serbisyo.
Gibutyag usab sa BoC nga nagkadugang ang kasopistikado sa operasyon sa mga smuggling syndicates, lakip ang paggamit og mga pribadong sakayan aron makalikay sa mga awtoridad.
Tungod niini, gimandoan ang tanang collection districts nga pakusgon ang intelligence gathering, risk profiling ug enforcement operations, samtang palig-onon usab ang koordinasyon sa Philippine Coast Guard, Philippine Navy, Philippine National Police, National Bureau of Investigation, ug mga lokal nga panggamhanan.
Gipasalig usab sa BoC nga ipadayon ang modernisasyon sa ahensya ug ang mas lig-on nga intelligence-driven enforcement batok sa smuggling.
