Gipasidunggan ang lima ka mga batang Pinoy karatekas nga mipakita og gilas atol sa 3rd Asian Karate Youth Open Championship and Training Camp nga gipahigayon sa Hangzhou, China gikan Hulyo 22 hangtod Hulyo 26, 2026.
Giila pinaagi sa Senate Resolution No. 580 ni Senador Bam Aquino ang makadayeg nga performance sa delegasyon sa Pilipinas gikan sa Fight Alliance Sports Team-International Shotokan Karate Federation o FAST-ISKF ug Alfonso Karatedo Kobudo Renmei o AAKR batok sa mga kaubanang martial artist gikan sa nagkalain-laing bahin sa Asya.
Nasakmit sa 9-anyos nga si Romeo Viktor Enriquez sa FAST-ISKF ang bulawang medalya sa Under-10 Male Kumite (+40 kg) category ug nakahuman usab sa Top 5 sa Under-10 Male Kata category sa iyang unang international competition.Nakuha usab sa 13-anyos nga si Raphael Mariano Herrera, nga kauban usab ni Enriquez, ang iyang ikaduhang sunod nga bronze medal sa Under-14 Male Kata. Nakab-ot usab ni Ripley Tate Borromeo ang Top 5 sa Under-12 Female Kata ug Top 7 sa Under-12 Female Kumite.
Giila usab ni Aquino sila Ellis Sebastian Canoza ug Colin Isaiah Paolo sa FAST-ISKF, nga gibansay ni national team coach ug kanhi Karate Pilipinas national team captain Engene Stoner Dagohoy.
Gibutyag ni Aquino nga nakatabang ang karate sa paghulma sa disiplina, kakugi, pagkamapainubsanon, kaligdong ug pagsalig sa kaugalingon sa mga kabataang Filipino, samtang gihatagan sila og kahigayunan nga magmalampuson sa international events.
Malampuson usab nga nadepensahan ni Wifredo Apellido sa AAKR ang iyang titulo human makasakmit og back-to-back gold medals sa Under-12 Male Kata ug nakakuha usab og silver medal sa Under-12 Male Kumite (-45 kg).Kauban usab sa AAKR Karatedo delegation si Ysabella Arwen Varias.
