Gitumbok ni House prosecution spokesperson Ace Barbers ang iyang gihulagway nga “template” nga testimonya nila Gina Acosta ug Lemuel Ortonio, nga parehong nagtudlo kang Col. Raymund Dante Lachica kabahin sa implementation sa confidential funds sa Office of the Vice President.
Si Acosta, kanhing OVP special disbursing officer, ug si Ortonio, OVP Assistant Secretary ug Assistant Chief of Staff, parehong gideklarang hostile witnesses sa Senate impeachment court.
Nasentro ang ilang testimonya sa upat ka ₱125-million confidential fund tranches nga gi-release gikan Disyembre 2022 hangtod third quarter sa 2023.
Mitestigo si Acosta nga iyang gitunol kang Lachica ang cash human gi-designate ni Vice President Sara Duterte ang security officer sa pagpatuman sa confidential activities. Si Lachica kaniadto commander sa Vice Presidential Security and Protection Group.
Sumala pa kay Ortonio nga kang Lachica gikan ang iyang nahibal-an kabahin sa ground operations ug impormasyon nga gigamit niya sa pag-draft sa OVP responses ngadto sa Commission on Audit.
Matod ni Barbers, nakadugang og gibug-aton ang testimonya ni Ortonio sa naunang testimonya ni Acosta kabahin sa papel ni Lachica.
Gikuwestiyon usab sa prosecution nganong gitunol kang Lachica ang confidential funds, tungod kay base sa testimonya sa korte, dili siya special disbursing officer o fidelity-bonded accountable officer.
Samtang, nagkanayon si Deputy Speaker Jefferson Khonghun nga sa posisyon sa prosecution, ang mga testimonya ug ebidensiya kabahin sa request, release ug implementation sa confidential funds nagtudlo balik sa leadership sa OVP.
Sa katapusan, gipahayag ni Barbers nga nagtuo ang prosecution nga nakapresentar na sila og importanteng testimonial ug documentary evidence ngadto sa senator-judges. Apan wala pa mahuman ang ilang presentasyon, tungod kay aduna pay ubang witnesses ug documentary evidence nga ilang ipresentar samtang nagpadayon ang impeachment trial.
