Nagkanayon si kanhi presidential spokesman Atty. Harry Roque nga adunay kunoy nang “hudas” o nagtraydor kang Senador Ronald “Bato” dela Rosa.
Gihimo sa kanhing opisyal sa gobyerno ang maong pahayag pinaagi sa usa ka post online human mikatag ang mga balita nga giingong nadakpan na ang senador tungod sa existing arrest warrant gikan sa International Criminal Court (ICC).
Sumala sa post ni Roque sa iyang social media account kaniadtong Martes, Agosto 4, 2026 nga adunay mensahe nga: “Meron nga daw na nang-hudas kay Bato.”
Hinuon wala na naghatag og dugang detalye si Atty. Roque, wala na usab niya pa-nganli kung kinsa ang iyang gipasabot nga nagtraydor sa senador.
Gihimakak usab sa pipila ka opisyal sa gobyerno ug ahensya ang mga taho nga nadakpan na si Senador Bato.
Mipahayag ang National Bureau of Investigation (NBI), Philippine National Police (PNP), ug Department of the Interior and Local Government (DILG) nga wala silay opisyal nga impormasyon o kumpirmasyon kabahin sa giingong pagkadakop sa mambabalaod.
Kahinumdoman nga lakip si dela Rosa sa mga ginganlan sa ICC isip giingong co-perpetrators ni kanhi Pangulo Rodrigo Duterte sa kaso nga crimes against humanity tungod sa iyang giingong papel sa kampanya batok sa ilegal nga droga sa administrasyon ni Duterte.
