Gimonitor sa Provincial Disaster Risk Reduction and Management Office (PDRRMO) ang kalidad sa hangin sa Cebu human miabot sa pipila ka bahin sa lalawigan ang ashfall gikan sa pag-erupt sa Bulkang Kanlaon.
Sumala ni PDRRMO Chief Retired Colonel Dennis Francis Pastor nga naapektuhan ang Toledo City, Aloguinsan, Pinamungahan, Cebu City, ug uban pang mga lugar tungod sa hangin nga nagdala og abo sa bulkan.
Nagpadala na ang provincial government og assessment teams, food supplies, ug 500 ka N95 face masks, samtang andam usab nga ipanghatag ang dugang 6,000 ka face masks sa mga lugar nga labing naapektuhan.
Gimandoan usab ni Governor Pamela Baricuatro ang PDRRMO nga makigtinabangay sa mga lokal nga panggamhanan ug uban pang ahensya aron masiguro ang paspas nga pagresponde sa sitwasyon.
Gisuspinde ang klase sukad pa kaniadtong Huwebes sa pipila ka mga siyudad ug lungsod lakip ang Cebu City, Toledo City, Balamban, Talisay City, Minglanilla, Pinamungahan, Consolacion, Aloguinsan, Mandaue City, Cordova, Liloan, Asturias, Naga City, Sogod, Compostela, Carcar City, San Fernando, Santa Fe, Argao, ug Dumanjug isip lakang sa pagpanalipod sa publiko.
Gipahimangnoan ang mga residente nga magsul-ob og face mask, magpabilin sulod sa balay kutob sa mahimo, ug likayan ang dili kinahanglanong pagbiyahe aron malikayan ang dili maayong epekto sa ashfall sa panglawas.
