Gisupakan sa Pilipinas ang pasangil sa China nga gidaot sa gisadsad nga BRP Sierra Madre sa Ayungin shoal ang coral reef ecosystem sa maong lugar.
Inay, gitudlo ni National Task Force- West Philippine Sea Spokesperson Jonathan Malaya ang China nga napamatud-ang hinungdan sa kadaot sa mga coral ug nakadaot sa maong habitat ug panginabuhian sa libu-an ka mananagat nga Pilipino.
Gitawag usab sa opisyal ang maong pasangil sa mga gitawag nga Chinese experts batok sa Pilipinas nga walay kamatuuran ug pagtipas lamang sa maong isyu.
Gibuhat sa maong opisyal ang pamahayag, human nga gireport sa Chinese state-owned media nga Global Times niadtong Lunes nga nahibal-an matud pa sa Chinese experts nga nagdala og kadaot sa coral reefs sa ayungin ang gitaya nga BRP Sierra Madre ug polusyon gikan sa mga basura ug hugaw gikan sa personal nga nakaistasyon sa barko base matud pa sa ilahang scientific analysis.
Apan sa bahin sa Pilipinas, gikanayon ni Malaya nga nakakuha usab ang Pilipinas og ebidensya nga nagapakita nga responsable ang China sa grabeng kadaot sa corals sa Bajo de Masinloc, Rozul Reef, Escoda Shoal, Sabina Shoals og bisan sa Pag-asa Cay 1, Pag-asa Cay 2 ug Pag-asa Cay 3.
Matud pa niini nga grabe usab nga nakadaot sa marine environment sa West Philippine Sea ang grupo ug illegal fishing activities nga Chinese Maritime Militia sa maong gikaingon kadagatan.
Sa ulahi, nagpasidaan ang tigpamaba sa NTF-WPS sa publiko ug sa international community batok sa pagpaningkamot sa China nga magpakatag og fake news ug mali nga impormasyon batok sa Pilipinas human sa panawagan alang sa usa ka independent nga marine scrientific assessment sa West Philippine Sea.
