-- ADVERTISEMENT --

Gipalapdan pa sa bag-ong balaod ang government voucher program alang sa mga estudyante human pirmahan ni Presidente Ferdinand Marcos Jr. ang Republic Act No. 12327 o Basic Education Voucher Assistance Act niadtong Nobyembre 12, 2026.

Ubos sa balaod, hatagan og pinansyal nga tabang ang mga kwalipikadong estudyante gikan sa middle-income households paubos aron makasulod sa mga pribadong eskwelahan. Mas dako usab ang mahimong voucher assistance nga madawat sa mga estudyante gikan sa kabos nga pamilya, depende sa pagtino sa Department of Education o DepEd.

Prayoridad sa programa ang mga estudyante gikan sa congested public schools, nagpuyo sa mga lugar nga walay duol nga publikong eskwelahan, ug mga komunidad nga kulang ang kapasidad sa mga classroom.

Lakip usab sa sakop ang mga senior high school students nga walay mapilian nga angay nga subjects o electives sa ilang publikong eskwelahan.

Nagtakda usab ang balaod sa pagtukod sa Bureau of Private Education sulod sa DepEd nga modumala sa kalidad, regulasyon ug pagmonitor sa mga pribadong eskwelahan nga moapil sa programa.

-- ADVERTISEMENT --

Gilauman nga sugdan ang pagpatuman sa voucher assistance alang sa kindergarten ug elementary students sa school year 2027-2028, depende sa pagkaanaa sa pondo.