-- ADVERTISEMENT --

Gilauman nga mahimong mas sistematiko ug ibase sa aktuwal nga panginahanglan ang pag-angkat sa mga produktong agrikultural sa nasud human pormal nga ipatuman ang Memorandum of Agreement o MOA tali sa Department of Agriculture–Bureau of Plant Industry (DA-BPI) ug Philippine Statistics Authority (PSA).

Pinaagi sa maong kasabutan, gamiton sa DA-BPI ang opisyal nga datos sa PSA kabahin sa lokal nga ani ug suplay isip basihan sa pagpagawas sa import permits, aron malikayan ang sobra nga pag-angkat ug dili angay nga pag-abot sa mga imported nga produkto sa merkado.

Gidasig ni Senador Francis “Kiko” Pangilinan ang duha ka ahensya nga paspason ang pagpatuman sa kasabutan atol sa pagdungog sa Senado uban sa mga opisyal sa gobyerno.

Matud pa sa mga lokal nga mag-uuma, usa sa ilang dugay nang reklamo ang pagsulod sa daghang imported nga produkto panahon sa anihan, nga makapapaubos sa presyo sa ilang mga ani ug makapahinungdan sa pagkalugi.

Gikumpirma sa mga representante sa mga ahensya nga napirmahan na ang MOA ug naghulat na lamang sa seremonyal nga pagpirma sa dili pa kini ipatuman.

-- ADVERTISEMENT --