Dili hatagan og pondo sa Senado ang mga proyekto sa Department of Public Works and Highways o DPWH nga walay igong basihanan ug supporting documents isip kabahin sa mas hugot nga pagsusi sa 2027 national budget.
Gipasiugda ni Senate President Sherwin Gatchalian nga kinahanglan mosumite ang DPWH og lima ka importanteng dokumento aron mapamatud-an nga napag-aralan ug andam nang ipatuman ang mga proyekto.
Lakip sa mga gikinahanglang dokumento ang feasibility study, resolusyon gikan sa local government units o LGUs ug technical description sa proyekto.
Matud ni Gatchalian, tangtangon sa panukalang budget ang mga proyekto nga dili makakompleto sa gikinahanglang dokumento. Apan mahimo pa kining ikonsiderar kon makumpleto na sa DPWH ang mga kinahanglanong papeles.
Samtang, gikatakdang sugdan sa Senado karong Nobyembre 23 ang plenary deliberations alang sa 2027 national budget.











