Gipahibalo ni US President Donald Trump ang usa ka bag-ong kasabotan sa pamatigayon tali sa Pilipinas ug Estados Unidos nga iyang gihulagway isip “landmark deal” nga gilauman makapalig-on sa relasyon sa ekonomiya sa duha ka nasud.
Matud ni Trump, nagkauyon sila ni Pangulong Ferdinand Marcos Jr. sa usa ka bag-o ug lahi nga kasabutan sa pamatigayon nga gilauman makahatag og kaayohan ilabina sa sektor sa agrikultura ug enerhiya.
Gipasiugda ni Trump ayha kini mibiya sa Maynila padulong sa China aron motambong sa APEC Economic Leaders’ Meeting nga dali nilang nahuman ang negosasyon ug mapuslanon kuno ang maong kasabutan alang sa duha ka nasud. Gilauman usab niyang mas molig-on pa niini ang dugay nang alyansa sa Pilipinas ug Estados Unidos.
Apan, wala pa gipagawas ang kompletong detalye sa maong agreement, lakip ang posibleng mga kausaban sa taripa, mga konsesyon sa matag panig ug petsa sa pagpatuman niini. Wala pa usab nagpagawas og opisyal nga pagpasabot ang Malacañang kalabot sa mahimong epekto niini sa lokal nga mga industriya.
Nahimo usab ang maong anunsiyo sa tuig sa pagsaulog sa ika-80 nga anibersaryo sa diplomatikong relasyon ug ika-75 nga anibersaryo sa Mutual Defense Treaty tali sa Pilipinas ug Estados Unidos.











