Pormal nang gihangyo sa legal team ni Davao City 1st District Representative Paolo “Pulong” Duterte si National Bureau of Investigation (NBI) Director Melvin Matibag nga boluntaryong mo-inhibit sa imbestigasyon sa mga alegasyon ni kanhing pulis Rodulfo M. Gracioso Jr. batok kaniya, sa iyang pamilya ug sa ubang personalidad.
Giklaro ni Pulong nga dili tuyo sa ilang hangyo nga pugngan ang imbestigasyon o makalikay sa pagpanubag, kondili aron masiguro ang patas, walay pinalabi ug kasaligan nga proseso.
Tulo ang iyang basihan sa maong hangyo. Una, ang giingong sayong paghukom ni Matibag human niini mihulagway nga 99 ka porsiyento nga tinuod ang mga alegasyon ni Gracioso bisan wala pa mahuman ang imbestigasyon. Matod ni Pulong, giklaro usab sa direktor nga wala gisusi sa polygraph examination ang katinuod sa mga akusasyon batok kanila.
Ikaduha, wala kuno sila hatagi og higayon nga makatubag sa mga alegasyon sa wala pa kini gipakaylap sa nasudnong media. Nakuha lamang nila ang kopya sa affidavit ni Gracioso niadtong Oktubre 5, 2026, human pormal nga mihangyo ang ilang mga abogado.
Ikatulo, gikuwestiyon ni Pulong ang pagka-obhetibo ni Matibag tungod sa iyang nangaging mga pahayag batok kang Vice President Sara Duterte, lakip ang pag-angkon nga nagsulat siya og tulo ka kolum bahin sa Bise Presidente niadtong 2024.
Gipasiugda sa kongresista nga ang imbestigasyon kinahanglan ibase sa ebidensya ug dili sa mga pahayag nga gipakaylap sa media, aron dili mahatagan og konklusyon ang mga alegasyon sa wala pa matino ang kamatuoran.
Gihisgotan usab niya ang nangaging hangyo ni Matibag nga mo-inhibit ang Davao City prosecutor sa pagdumala sa libel ug cyberlibel complaints nga gisang-at ni Pulong batok kaniya ug sa ubang personalidad. Niadtong higayona, gikuwestiyon ni Matibag ang pagka-walay pinalabi sa prosecutor tungod sa posibleng relasyon niini sa partner sa amahan sa kongresista.
Giuyonan ang maong hangyo ug gibalhin ang mga kaso ngadto sa Office of the Regional Prosecutor sa Region XI.
Alang kang Pulong, ang maong hitabo maoy basihan sa iyang paghangyo nga ipatuman usab kang Matibag ang samang prinsipyo sa paglikay sa posibleng panagbangi sa interes ug pagduhaduha sa pagka-walay pinalabi.
