-- ADVERTISEMENT --

Ipadayon karong Huwebes, Nobyembre 19,2026 ang impeachment trial batok kang Vice President Sara Duterte sa Senado, human gisuspenso sulod sa pipila ka adlaw ang mga pagdungog tungod sa pagpahigayon sa 49th Association of Southeast Asian Nations (ASEAN) Summit sa nasud.

Gilauman nga mopresentar ang defense team ni Duterte og upat ka mga saksi karong adlawa ugma, Nobyembre 20, isip kabahin sa pagpadayon sa ilang pagpresentar og ebidensiya batok sa nahibiling Article II sa impeachment complaint.

Lakip sa gilauman nga motestigo si Atty. Rainer Dela Fuente sa AML Consulting Philippines, nga motuki sa mga probisyon sa Anti-Money Laundering Act o AMLA.

Motambong usab si Department of Trade and Industry Undersecretary for Industry Development and Investment Promotions Group Ceferino Rodolfo aron maghatag og katin-awan kalabot sa pagparehistro sa Cale88 Foods Corporation sa Board of Investments.

Gilauman usab nga hisgotan ni Food and Drug Administration Director IV Pilar Marilyn Pagayunan ang pagparehistro sa produkto sa Cale88 nga sweetened banana chips.

-- ADVERTISEMENT --

Samtang, gilauman usab nga mopamatuod si Rowena Mendoza, general manager sa Center for International Expositions and Missions o CITEM, o ang iyang representante, kalabot sa mga komunikasyon ug imbitasyon ngadto sa Cale88 aron moapil sa mga food exposition.

Sumala kang Senate impeachment court spokesperson Atty. Reginald Tongol, naglangkob sa mga alegasyon ubos sa Article II ang testimonya sa upat ka mga saksi.

Kahinumduman nga nakasentro ang maong artikulo sa giangking dili mapatin-aw nga bahandi, dili kompleto nga deklarasyon sa mga kabtangan sa Statement of Assets, Liabilities and Net Worth o SALN, ug giingong gidili nga interes sa negosyo sa bise presidente.

Una nang gipahibalo sa depensa nga nagplano kini nga mopresentar pa og walo hangtod napulo ka mga saksi sa umaabot nga mga pagdungog.

Samtang, nagpabiling nakapunting ang impeachment trial sa Article II human gibawi sa prosecution panel ang tulo pa ka artikulo sa impeachment complaint niadtong Oktubre 13.