Nanawagan si Senadora Imee Marcos og mas lig-on ug dihadiha nga mga lakang diplomatiko aron mapadali ang pagtukod og epektibo ug legal nga Code of Conduct sa West Philippine Sea (WPS).
Gisundan kini sa pahayag ni US President Donald Trump nga dili siya nabalaka sa tensiyon sa maong katubigan ug masulbad ra kuno ang isyu. Gipadayag kini ni Trump atol sa bilateral meeting nila ni Pangulong Ferdinand Marcos Jr. sa Malacañang, diin gipangutana siya kon andam ba ang Estados Unidos nga ipatuman ang Mutual Defense Treaty kung musamot ang tensyon.
Matud sa Senadora, nagpaabot usab siya og mas konkretong mga lakang aron mahunong ang kagubot sa Myanmar.
Bisan pa niini, giila niya ang pipila ka nahimong kalampusan sa pagpangulo sa Pilipinas sa ASEAN karong 2026, lakip ang pagpirma sa ASEAN Digital Economy Framework Agreement, kooperasyon sa regional power grid ug pagpalig-on sa kampanya batok sa transnational online crimes.
Gikuwestiyon usab ni Marcos ang gikatahong ₱22.9 bilyones nga gasto sa Pilipinas sa pagpahigayon sa ASEAN Summit. Matud niya, kinahanglan timbang-timbangon ang mga nahimong kalampusan sa diplomasya ug ang dako nga gasto niini, ilabina taliwala sa pagsaka sa presyo sa mga palaliton ug mga hagit sa ekonomiya nga giatubang sa mga Pilipino.
Samtang sa laing bahin,miubos ang ihap sa mga barko sa China nga namatikdan sa importanteng mga bahin sa West Philippine Sea atol sa semana sa pagpahigayon sa ASEAN Summit sa Pilipinas.
Base sa datos sa Armed Forces of the Philippines o AFP, mikabat sa 19 ka barko sa China ang namonitor sa Ayungin Shoal, Bajo de Masinloc, Escoda Shoal ug Pag-asa Island gikan Nobyembre 9 hangtod 16. Mas ubos kini og 10 ka barko kon itandi sa 29 nga namatikdan gikan Nobyembre 3 hangtod 8.
Sa kinatibuk-ang 19 ka barko, 14 niini ang gikan sa China Coast Guard samtang lima ang mga barkong panggubat sa People’s Liberation Army Navy. Sa miaging semana, 20 ka barko sa China Coast Guard ug siyam ka barko sa hukbong pandagat sa China ang natala.
Pinakadaghan ang namatikdan sa Bajo de Masinloc nga adunay siyam ka barko, gisundan sa Ayungin Shoal nga adunay unom. Tulo ang namonitor duol sa Pag-asa Island samtang usa ang namatikdan sa Escoda Shoal.
Naitala ang pagkunhod sa presensya sa mga barko sa China dungan sa pagpahigayon sa Pilipinas sa ASEAN Summit. Apan, wala pay direktang kalambigitan nga napamatud-an tali sa duha ka panghitabo.










