-- ADVERTISEMENT --

Gidakop sa kapulisan ang kapin 200 ka indibidwal atol sa protesta sa Sucat People’s Park sa Muntinlupa City niadtong Domingo, Nobyembre 15, sa pagsugod sa 49th ASEAN Summit.

Matud ni Southern Police District Director Police Brigadier General Rodel Pastor, gikatakdang pasakaan og kaso ang mga nadakpan human sa kagubot nga nahitabo sa dihang wala kuno mosunod ang mga nagprotesta sa mga pahimangno sa kapulisan ug nagpugos sa pagpahigayon sa ilang programa sa kalsada.

Gisakay ang mga nadakpan sa tulo ka trak sa Philippine National Police ug gidala sa National Capital Region Police Office headquarters sa Camp Bagong Diwa sa Taguig City. Aduna usab mga nagprotesta nga gidala sa ospital human malipong atol sa kagubot.

Kadaghanan sa mga nadakpan giingong sakop sa mga grupo gikan sa Southern Tagalog. Gisupak sa maong grupo ang implementasyon sa Pax Silica Initiative ug Luzon Economic Corridor sa Pilipinas, ingon man ang pagbisita ni US President Donald Trump nga motambong sa ASEAN Summit.

Gipatin-aw ni Pastor nga ilang gipatuman ang ilang katungdanan sa pagdumala sa seguridad atol sa maong kalihokan.

-- ADVERTISEMENT --