Mubalik sa Pilipinas si Amnesty International Secretary-General ug kanhi United Nations Special Rapporteur on Extrajudicial Killings Agnès Callamard aron makigtagbo sa mga pamilya sa mga gikatahong biktima sa kampanya batok ilegal nga droga sa administrasyon ni kanhin Pangulo Rodrigo Duterte.
Magpabilin sa nasud si Callamard gikan Nobyembre 19 hangtod Nobyembre 22, 2026, nga maoy unang pagbisita niini sukad sa 2017 human ipahamtang sa administrasyong Duterte ang immigration ban batok kaniya.
Gipahayag ni Callamard nga malipayon siya nga makabalik sa Pilipinas, nga aniya duol sa iyang kasingkasing ug diin aduna siyay daghang higala.
Dugang pa niini, dako usab kuno ang iyang pagpaabot nga makigkita pag-usab sa mga biktima ug nakaluwas sa kampanya batok droga aron personal nga mapasidunggan ang ilang kaisog ug kalig-on sa pag-atubang sa mga pagsulay.
Lakip usab sa iyang mga gikatakdang mahimamat ang pipila ka mga abogado nga kritiko sa kampanya batok illegal nga droga, ingon man ang mga mamamahayag nga nagbalita ug nag-imbestigar sa maong kampanya.
Gihulagway ni Callamard nga nahitabo ang iyang dugay nang gipaabot nga pagbalik sa nasud sa usa ka mahinungdanong panahon, ilabina kay nag-atubang na sa paghusay sa Internastional Criminal Court sa The Hague Netherlands si Duterte may kalabotan sa kasong crime against humanity of murder.
Gipasalamatan usab niini ang paningkamot sa katawhang Pilipino, mga abogado ug civil society groups nga nakatampo aron matuman ang pagtinguha nga makab-ot ang hustisya sa internasyonal nga lebel.
Kahinumdoman nga kaniadtong 2017, mibisita sa Pilipinas si Callamard isip usa sa mga kritiko sa drug war aron motambong sa usa ka academic conference kabahin sa drug policy ug sa pagkomemorar sa ika-30 nga anibersaryo sa Commission on Human Rights o CHR.
