Gihangop ni Philippine Foreign Affairs Secretary Ma. Theresa Lazaro ang dugang paningkamot ug panaghiusa sa mga miyembro sa Association of Southeast Asian Nations (ASEAN) aron mapalig-on ang kalinaw ug kalig-on sa rehiyon.
Sa iyang mensahe atol sa ASEAN Foreign Ministers’ Meeting, giawhag ni Lazaro ang iyang mga kaubang foreign ministers nga ipadayon ang kooperasyon alang sa kalinaw, panaghiusa ug kalamboan sa mga nasud nga sakop sa regional bloc.
Matud sa kalihim, daghan na ang nahimo sa ASEAN ubos sa chairmanship sa Pilipinas, apan aduna pa gihapoy mga lakang nga kinahanglan ipadayon aron masiguro ang kalig-on sa Southeast Asian region.
Gipasabot usab niya nga dili masukod ang kalampusan sa regional cooperation pinaagi lamang sa kadaghan sa mga dokumentong nahimo o mga miting nga nahatagan og pagtagad.
Hinuon, ang mas importanteng sukdanan mao ang abilidad sa matag miyembro nga himuong konkretong resulta ang mga panaghisgot ug panagtigom, nga direktang makahatag og kaayohan sa katawhan sa ilang tagsa-tagsa ka nasud.
