Apektado ang kapin 300 ka domestic flights sa Metro Manila tungod sa pag-usab sa iskedyul ug pagkansela sa pipila ka biyahe alang sa Asean Summit 2026 sa sunod semana.
Sumala ni Transportation Secretary Vince Dizon, tumong sa maong mga kausaban nga mahatagan og luna ang pag-abot ug pagbiya sa mga langyaw nga delegado ug pangulo sa nasud, nga magsugod karong Nobyembre 14, 2026.
Magpatuman usab og hugot nga seguridad sa Metro Manila, ilabi na sa Ninoy Aquino International Airport (NAIA), diin motugpa ang kadaghanan sa mga bisita.
Alang sa mga apektadong pasahero, naghatag ang mga airline og tulo ka kapilian: libre nga pag-usab sa iskedyul nga walay multa, hingpit nga refund o travel fund alang sa sunod nga biyahe.
Samtang, walay gipaabot nga kanselasyon sa international flights, bisan posible ang panagsang pagkalangan niini.
Giawhag ni Dizon ang mga biyahero nga susihon daan ang ilang flight schedules ug mokontak sa tagsa-tagsa nilang airline alang sa mga pahibalo. Ipatik usab ang listahan sa mga apektadong biyahe sa mga opisyal nga website sa DOTr, CAAP ug CAB.
Magbutang usab og help desks sa NAIA, Clark International Airport ug Mactan-Cebu International Airport aron motabang sa mga pasaherong maapektuhan sa mga kausaban.
