Gitapos na ni Naga City Mayor Leni Robredo ang posibilidad nga mobalik siya sa nasudnong politika, lakip na ang pagdagan isip presidente o senador sa 2028 nga piniliay.
Giklaro pag-usab ni Robredo ang iyang desisyon atol sa pakighinabi sa mga tigbalita sa Naga City karung Lunes, Nobyembre 9, taliwala sa padayon nga pag-awhag sa pipila sa iyang kanhing mga kaalyado ug mga tigpaluyo nga modagan pag-usab sa mas taas nga katungdanan.
Matod sa alkalde, dugay na siyang nakahukom nga dili na mobalik sa nasudnong panggobyerno ug wala nay makapausab sa iyang hunahuna.
Gipasabot ni Robredo nga kabahin sa iyang nahimong desisyon ang dili paggamit sa iyang katungdanan isip mayor nga pangandam o lakang alang sa posibleng pagdagan sa 2028.
Gipasiugda usab niya nga bisan pa kon modesisyon siyang dili na modagan alang sa ikaduhang termino isip mayor sa Naga City, dili gihapon kini magpasabot nga mobalik siya sa nasudnong pulitika.
Giangkon usab sa kanhing bise presidente nga base sa iyang kaugalingong pagtimbang-timbang, nakita niya ang pipila ka limitasyon sa iyang katakos sa pag-atubang sa komplikadong dagan sa nasudnong pulitika.
Bisan nagtuo siyang kaya niya ang pagtuman sa mga buluhaton sa nasudnong panggobyerno, matod niya, nagkinahanglan kini og igong kahibalo ug kaabtik sa politika aron madumala dili lamang ang trabaho kondili ang mas halapad nga kahimtang sa politika sa nasud.
Samtang, nagpahayag si Robredo nga andam siyang mosuporta sa ubang mga tawo nga sa iyang pagtan-aw adunay katakos ug angayan nga mangulo sa nasud.
Kahinumduman nga nagsilbi si Robredo isip bise presidente gikan sa 2016 hangtod 2022 ug midagan sa pagkapresidente atol sa 2022 nga piniliay, diin napildi siya ni Presidente Ferdinand Marcos Jr.
Niadtong 2025, mibalik siya sa lokal nga panggobyerno ug napili isip mayor sa Naga City, diin gusto niyang ipunting ang iyang panahon sa mga programa ug panginahanglan sa mga lumulupyo.
Bisan pa sa padayon nga paglakip sa iyang ngalan sa mga posibleng modagan sa pagkapresidente sa 2028, gipasiugda ni Robredo nga wala na sa iyang mga plano ang pagdagan sa bisan unsang nasudnong katungdanan.
