Giawhag ni kanhi House quad-committee overall chairman Robert Ace Barbers ang matag pamilyang Pilipino nga mangandam alang sa posibleng 72 ka oras nga walay dinaliang tabang gikan sa gobyerno panahon sa emerhensya.
Matod ni Barbers, angay nga mahimong nasudnong prayoridad ang pagpangandam sa mga kalamidad ug posibleng krisis sa seguridad nga mahimong hinungdan sa dugay nga paghunong o pagkalangan sa nag-unang mga serbisyo.
Gipasabot usab sa kanhing kongresista nga posibleng maapektuhan sa krisis sa seguridad sa rehiyon ang mga ruta sa patigayon sa kadagatan, suplay sa lana ug pagkaon, ingon man ang serbisyo sa telekomunikasyon.
Tungod niini, gipasiugda niya ang panginahanglan nga palig-onon ang kahandaan sa publiko, ilabina kay nahimutang ang Pilipinas sa Indo-Pacific, duol sa Taiwan Strait ug nagpadayon ang tensiyon sa West Philippine Sea (WPS).
Giklaro hinuon ni Barbers nga dili tumong sa iyang panawagan nga hadlokon ang publiko o ipasabot nga dili malikayan ang gubat, kondili masiguro nga andam ang nasud sa posibleng pagkalangan sa mga batakang serbisyo.
Gawas sa mga hulga sa seguridad, gipunting usab niya nga kinahanglan seryosohon sa matag panimalay ang pagpangandam tungod sa kanunay nga pag-atubang sa Pilipinas sa mga linog, super typhoon, pagbaha ug pagbuto sa mga bulkan.
Nanawagan usab siya sa Office of Civil Defense (OCD), National Disaster Risk Reduction and Management Council (NDRRMC) ug sa ubang sektor sa gobyerno nga palig-onon ang ilang contingency plans, magpahigayon og regular nga pagbansay sa mga komunidad ug magtukod og kasaligan nga sistema sa komunikasyon panahon sa emerhensya.
Gisugyot usab ni Barbers ang pag-andam og mga alternatibong pamaagi aron magpadayon ang importanteng serbisyo publiko panahon sa kagubot o kalamidad, lakip na ang pagpanalipod sa mga imprastraktura.
Gihatagan niya og gibug-aton nga kinahanglan mahimong bahin sa nasudnong estratehiya sa depensa ang pagpangandam sa mga lumulupyo, lakip na ang pagpanalipod sa teritoryo sa nasud.
Matod pa niya, dili igo ang kusog sa depensa sa Pilipinas kon dili usab andam ang mga lumulupyo sa mga krisis nga mahimo pang maandaman.
