Magduso si Senator Panfilo “Ping” Lacson nga adunay opisyal nga transcript ug padayon nga livestreaming sa mga hearing sa bicameral conference committee aron masubaybayan sa publiko ang mga kausaban sa gisugyot nga 2027 national budget.
Matod ni Lacson, importante nga adunay transcript o opisyal nga rekord sa mga diskusyon sa bicam aron klarong mailhan kon kinsa ang nagsugyot sa mga amyenda ug kinsa ang nagduso sa realignment sa mga probisyon sa badyet.
Gipasiugda ni Lacson nga dugay nang walay opisyal nga transcript ang mga hearing sa bicam.
Busa, gawas sa livestreaming, gisugyot usab niya nga ipatik sa website sa Senado ang mga rekord sa deliberasyon aron mailhan ang mga senador nga nagsugyot sa mga kausaban sa panukalang budget.
Plano usab nga imbitaron sa bicam ang mga civil society groups nga magsilbing mga tigbantay batok sa posibleng pag-abuso sa proseso.
Tungod niini, giawhag ni Lacson ang maong mga grupo nga dili lamang magbantay kondili ibutyag usab sa publiko ang mga kadudahang lakang aron mapanubag ang mga nalambigit niini.
