Mipasalig ang Moro Islamic Liberation Front (MILF) nga magpadayon sa pakigtambayayong sa nasudnong gobyerno aron hingpit nga matuman ang mga kasabotan nga gilatid sa Comprehensive Agreement on the Bangsamoro (CAB), ug dili lamang kutob sa pormal nga pagtapos sa proseso sa kalinaw.
Sa ilang pahayag, gipasiugda sa MILF nga tumong niini nga matuman ang mga pangandoy ug saad nga nahimong pundasyon sa pagsugod sa negosasyon alang sa kalinaw.
Misunod kini sa miting niadtong Nobyembre 4 sa Malacañang tali ni Presidente Ferdinand Marcos Jr. ug sa mga lider sa MILF, nga gipangulohan ni Chairman Ahod “Al Haj Murad” Ebrahim ug Vice Chair Mohagher Iqbal, kinsa maoy nangulo usab sa MILF Peace Implementing Panel.
Gihulagway sa MILF nga positibo ug nakatutok sa umaabot ang maong panagtagbo. Matod sa grupo, giila sa presidente nga dili makab-ot ang mga kalampusan sa proseso sa kalinaw sa Bangsamoro kon wala ang kooperasyon sa MILF.
Gipahibalo usab kuno ni Marcos ang iyang tinguha nga mas paspason ang pagpatuman sa mga nahibiling saad ubos sa CAB.
Lakip sa mga prayoridad ang normalization, pagpalambo sa panginabuhian ug ekonomiya, pag-usab sa mga kampo sa MILF, mga kahikayan sa seguridad, transitional justice, panag-uli ug mga lakang aron mapalig-on ang pagsalig sa duha ka partido.
Samtang, sumala kang Presidential Peace Adviser Secretary Mel Senen Sarmiento, gimandoan siya ni Marcos ug ang ubang may kalabotang ahensya sa gobyerno nga suod nga makigtambayayong sa MILF aron matuman ang kasabutan.
Gipahayag sa MILF nga naglaom kini nga magpadayon ang kooperasyon sa duha ka partido alang sa hingpit nga pagtuman sa mga saad nga gilatid sa CAB.
Gipirmahan sa gobyerno sa Pilipinas ug MILF ang Comprehensive Agreement on the Bangsamoro niadtong 2014. Nahimong basihan kini sa pagtukod sa Bangsamoro Autonomous Region in Muslim Mindanao (BARMM) niadtong 2019, human maratipikahan ang Republic Act No. 11054 o Bangsamoro Organic Law.
