Dili makatambong ang duha sa unang mga testigo sa depensa ni Vice President Sara Duterte sa pagsugod sa ilang presentasyon sa mga ebidensya sa impeachment trial karong Lunes, Nobyembre 9.
Sumala kang House lead prosecutor ug Batangas 2nd District Representative Gerville “Jinky Bitrics” Luistro, mibalibad sa pagpamatuod si constitutional law professor Ralph Sarmiento aron mapreserbar ang iyang kagawasan ug pagka-walay pinalabi isip legal scholar.
Dili usab makatambong si Atty. Suzette Balucanag-Punay, corporate counsel sa GenCorp Industries Inc. ug Metro City Chow Foods Corp., tungod sa iyang gikatakdang MRI.
Gilauman unta nga iyang ipresentar ang mga dokumento kalabot sa mga korporasyon ug negosyo nga nalambigit kang Duterte.
Matod ni Luistro, gilauman nga mopuli kanila isip unang mga testigo sa depensa sila Davao City Assessor Jaime Adalin, Island Garden City of Samal Assessor John Kenneth Enumerables, ug Matina Crossing Barangay Chairperson Cindy Colina.
Gilauman nga maghatag og katin-awan ang maong mga opisyal kalabot sa tax declarations ug mga mapa sa mga propyedad nga gikuwestiyon sa prosecution tungod sa giingong dili pagtakdo niini sa Statements of Assets, Liabilities and Net Worth o SALN ni Duterte.
Una nang gipresentar sa House prosecution ang mga titulo ug deed of sale sa duha ka propyedad nga giingong dili motakdo sa mga deklarasyon sa SALN sa Bise Presidente.Gikatakdang susihon sa prosecution ang mga pagpatin-aw sa mga testigo sa depensa.
