Mipasalig ang Philippine National Police (PNP) nga dili mahimong babag sa pagpatuman sa arrest warrant batok kang Senator Ronald “Bato” Dela Rosa ang kanhing paglingkod niini isip hepe sa nasudnong kapulisan.
Nagpadayon ang pagpangita sa senador nga giatubang ang warrant of arrest nga gipagawas sa International Criminal Court (ICC) kalabot sa kasong crimes against humanity nga adunay kalabotan sa war on drugs sa administrasyon ni kanhing Presidente Rodrigo Duterte.
Sumala kang PNP Spokesperson PCol. Allen Rae Co, dili mausab ang katungdanan sa mga pulis tungod lamang sa kanhing posisyon sa ilang gipangita.
Gipasiugda ni Co nga dili personal nga desisyon o konsiderasyong politikal ang mahimong basihan sa ilang operasyon.
Una nang gihagit sa Malacañang ang liderato sa Department of the Interior and Local Government (DILG) ug PNP nga siguruhong dili mahimong babag sa pagdakop kang Dela Rosa ang iyang kanhing paglingkod isip hepe sa PNP.
Padayon usab nga modawat ug mag-verify ang PNP sa mga impormasyon kalabot sa posibleng nahimutangan sa senador pinaagi sa ilang mga hotline.
Sa kasamtangan, gipakatap na ang mga tracker team sa nagkadaiyang bahin sa nasud aron masuta ang nahimutangan sa senador ug mapatuman ang warrant of arrest batok kaniya.
