Gikuwestiyon ni House prosecution counsel Atty. Lorna Kapunan ang operasyon sa Cale88 Foods Corp. human niya namatikdan ang kakulang sa mga empleyado ug hilaw nga materyales sa mga rekord sa kompanya nga giingong naghimo og banana chips.
“Banana chips daw ang negosyo pero walang saging sa libro,” matod ni Kapunan samtang gisusi ang mga dokumentong gipresentar sa impeachment trial ni Vice President Sara Duterte.
Base sa mga financial statement nga gisusi sa prosecution, gamay lamang ang nakatalang nahuman nang produkto sa kompanya, apan walay nakarehistrong hilaw nga materyales, supplies o mga produkto nga anaa pa sa proseso sa paghimo.
Gikuwestiyon usab ni Kapunan ang gidaghanon sa mga empleyado sa kompanya. Sumala sa General Information Sheets niini, walay naitalang rank-and-file employees niadtong 2023 ug 2024, samtang duha lamang ang nakarekord niadtong 2025.
Gihisgotan usab ni Kapunan ang kita sa kompanya nga mikabat sa ₱150.77 milyon niadtong 2024, ug gikuwestiyon kung giunsa pagpundo ang operasyon niini ug kung asa napadulong ang mga salapi nga misulod sa mga account sa kompanya.
Kabahin ang mga rekord sa Cale88 Foods sa pagsusi sa prosecution sa mga negosyong giugnay kang Vice President Sara Duterte ug sa iyang bana nga si Manases Carpio.
Apan, ang maong mga pangutana ug alegasyon kabahin pa lamang sa presentasyon sa prosecution ug kinahanglan pa kining tubagon sa kampo sa depensa.
