Gipahinabo ang mga paglangan sa biyahe sa kapin 10 ka flights sa Europe human giingong nakadawat kini og mga hulga sa pagpamomba niadtong Martes, Nobyembre 3.
Lakip sa mga apektadong biyahe ang mga flights sa Ryanair, diin upat niini ang giingong gitarget sa bomb threats samtang nagpadulong sa nagkalain-laing destinasyon.
Gipahigayon usab ang temporaryong pagsira sa usa ka airport sa Warsaw, Poland, human adunay mga report sa hulga nga may kalabotan sa mga eroplano.
Sumala sa Metropolitan Police sa London, lakip sa nakadawat og bomb threats ang mga flights nga gikatakdang molupad ug motugpa sa Heathrow Airport.
Samtang, gipalihok usab ang Italian Air Force aron i-escort ang usa ka flight sa Ryanair gikan sa Dublin nga padulong sa Rome-Fiumicino Airport.
Dugang pa sa mga insidente, duha ka flights nga padulong sa Warsaw ang nakadawat usab og mga hulga, lakip ang Scandinavian Airlines gikan sa Copenhagen ug LOT Polish Airlines gikan sa Heathrow.
Bisan pa sa sunod-sunod nga bomb threats, wala pay nakitang eksplosibo sa mga eroplano ug tugpahanan human sa gihimong halapad nga pagpangusisa sa mga otoridad.
