Gihatagan og dakong pagtagad ni Department of National Defense (DND) Secretary Gilberto “Gibo” Teodoro Jr. ang pagrespeto sa international law ug pagpalig-on sa kooperasyong panseguridad sa rehiyon atol sa 13th ASEAN Defence Ministers’ Meeting-Plus o ADMM-Plus nga gipahigayon sa Lapu-Lapu City, Cebu kaniadtong Oktubre 29, 2026.
Sa iyang pakigpulong atubangan sa mga representante sa ASEAN ug mga dialogue partners niini, gipresentar ni Teodoro ang tulo ka prayoridad alang sa kalinaw, kalig-on, ug seguridad sa Indo-Pacific region.
Lakip niini ang hugot nga pagtuman sa United Nations Charter ug sa 1982 United Nations Convention on the Law of the Sea o UNCLOS, pagpalig-on sa kooperasyon sa maritime security, ug pagpanalipod sa mga migrant workers ug seafarers ilabina panahon sa mga krisis sa nagkalain-laing nasud.
Gipasiugda usab sa kalihim ang panginahanglan sa panaghiusa sa mga nasud aron masiguro ang food security ug energy security taliwala sa mga hulga ug hagit sa global supply chain.
Gihatagan usab ni Teodoro og pagtagad ang papel sa international community sa pagpanalipod sa mga Overseas Filipino Workers o OFWs ug mga marinero nga dakong bahin sa kalihokan sa global economy, ilabina panahon sa mga armadong panagbangi ug emerhensiya.
Kabahin ang maong panagtigom sa sunod-sunod nga high-level meetings nga gi-host sa Pilipinas isip kabahin sa pagpangulo niini sa ASEAN karong tuiga.
Mitambong sa maong kalihokan ang mga defense ministers ug security leaders gikan sa napulo ka nasud nga sakop sa ASEAN, lakip ang ilang mga dialogue partners sama sa Estados Unidos, China ug Japan.
Tumong sa maong mga panagtigom nga mapalig-on ang diplomasya ug mahisgutan ang mga isyung geopolitikal, lakip na ang seguridad sa West Philippine Sea ug ang kalinaw sa tibuok Indo-Pacific region.
