Naglusad ang Department of Agriculture og opisyal nga imbestigasyon aron matino ang epekto sa pagdagsa sa imported nga karne sa baboy sa lokal nga industriya sa pagpamuhi og baboy.
Sumala sa DA, nakakita ang Trade Remedies Office og prima facie nga ebidensiya nga nagpakita sa posibleng dakong kadaot sa lokal nga industriya tungod sa pagdaghan sa imported pork, lakip na ang pag-ubos sa farmgate prices ug kita sa mga lokal nga magbababoy.
Sakop sa imbestigasyon ang mga datos gikan sa tuig 2021 hangtod Agosto 2026, subay sa Republic Act 8800 o Safeguard Measures Act, nga nagtugot sa imbestigasyon kung adunay ebidensiya nga ang pagdaghan sa imports naghulga sa lokal nga industriya.
Base sa datos sa Bureau of Customs, miabot sa 602.65 milyong kilo ang pork imports sa nasod gikan Enero hangtod Agosto karong tuiga, mas taas og 5.18% kumpara sa susamang panahon kaniadtong miaging tuig.
Tungod niini, girekomenda sa DA sa Tariff Commission ang pagtaas sa taripa sa imported pork og 10-percentage points, samtang nagtuon usab ang ahensya sa posibleng temporaryong paghunong sa pag-isyu sa Sanitary and Phytosanitary Import Clearances alang sa pipila ka pork products sulod sa 30 hangtod 60 ka adlaw.
Sa laing bahin, gipasaligan sa DA ang publiko nga igo ang suplay sa karne sa baboy sa Pilipinas, nga gibanabana nga adunay buffer stock nga molungtad og dul-an sa 170 ka adlaw.
Padayon pang susihon ang datos ug mga ebidensiya aron matino ang angay nga safeguard measures alang sa lokal nga industriya sa pagpamuhi og baboy.
