Nagpadayon ang negosasyon sa Department of the Interior and Local Government aron malikayan ang posibleng “madugong” engkuwentro sa pagdakop kang Senador Ronald “Bato” dela Rosa.
Miangkon si Interior Secretary Jonvic Remulla nga anaa kuno sa Mindanao nagtago si Dela Rosa, nga giingong giprotektahan sa usa ka impluwensiyadong grupo.
Sumala kang Remulla, nakig-negosasyon sila sa maong grupo nga giingong midangop sa senador aron malikayan ang posibleng pagnagbagi tali sa mga otoridad ug sa mga nagpanalipod kaniya.
Gipasidaan usab sa kalihim nga mahimong moabot sa 10,000 ka tawo ang posibleng mamatay kung mosangpot sa armadong engkuwentro ang operasyon. Hinuon, wala pay dugang nga detalye nga gihatag kabahin sa maong pag-banabana.
Una nang mipahayag si Remulla nga posibleng mosangpot sa kapintasan ang pagsulod sa mga kapulisan sa lugar diin giingong nagtago ang senador, ilabina tungod sa iyang kanhing posisyon isip hepe sa Philippine National Police.
Si Dela Rosa giatubang sa warrant of arrest gikan sa International Criminal Court o ICC kalabot sa kasong crimes against humanity nga adunay kalabotan sa kampanya batok sa ilegal nga droga panahon sa administrasyon ni kanhing Pangulong Rodrigo Duterte.
Sa pagkakaron, wala pay dugang nga kumpirmasyon gikan sa ubang otoridad bahin sa eksaktong nahimutangan ni Dela Rosa ug sa giingong grupong nagaprotekta niini.
