Nagkalain-lain og panan-aw ang managsuong senador nga sila si Sen. Joseph Victor “JV” Ejercito ug Sen. Jinggoy Estrada, uban ni Kanhing Senador o Department of Labor and Employment (DOLE) Secretary Francis Tolentino, sa isyu sa kontrobersiyal nga mga pahayag ni Chinese Ambassador to the Philippines Jing Quan kalabot sa West Philippine Sea.
Gikondena ni Tolentino ang pahayag sa embahador, nga iyang gihulagway nga sobra ug dili angay sa pamatasan sa usa ka diplomat. Gisuportahan usab niya ang lakang ni Pangulong Ferdinand Marcos Jr. nga ipatawag si Quan aron ipatin-aw ang iyang mga pahayag.
Sumala kang Tolentino, angay nga tahoron sa embahador ang Pilipinas ug ang mga balaod niini, ug gisugyot niya nga susihon sa Ministry of Foreign Affairs sa China ang nahitabo. Miuyon usab siya nga tun-an ang posibilidad nga ideklarang persona non grata si Quan. Kahinumdoman nga kanhing senador si Tolentino ug aktibo usab siyang nalambigit sa mga panaghisgot bahin sa West Philippine Sea.
Samtang, sumala kang Sen. Jv Ejercito, gihisgutan na sa Senado ang posibilidad sa pagpagawas og resolusyon batok sa embahador, nga iyang gihulagway nga “very rude, hostile, ug undiplomatic” human kini miingon nga dali rang mapildi sa China ang Pilipinas kon mogamit kini og puwersa.
Alang kang Ejercito, mas angay nga ilisan na sa Beijing ang maong diplomat kung seryoso kini sa pagpaayo sa relasyon sa duha ka nasod.
Sa laing bahin, nanawagan si Sen. Jinggoy Estrada nga unahon ang diplomasya ug pagtahod sa balaod, imbes nga dalion ang pagdeklarar kang Quan nga persona non grata, tungod sa posibleng epekto niini sa relasyon sa Pilipinas ug China.
Pagpasabot ni Estrada nga mapakita sa Pilipinas ang lig-on nga baroganan pinaagi sa makanunayon nga pagpanalipod sa 2016 Arbitral Award, samtang nagpabiling abli ang pultahan alang sa dayalogo.
