Nagpahayag ang National Bureau of Investigation (NBI) nga plano usab nilang susihon ang Statement of Assets, Liabilities and Net Worth (SALN) ni Davao City 1st District Representative Paolo “Pulong” Duterte.
Sumala kang NBI Director Atty. Melvin Matibag, gikinahanglan nilang susihon ang sulod sa SALN sa kongresista, human sa ilang imbestigasyon sa mga kabtangan nga nalambigit sa iyang igsoon nga si Bise Presidente Sara Duterte.
Lakip sa ilang susihon ang usa ka propiedad nga giingong tupad sa usa ka resort sa Davao City.
Apan, gibalibaran kuno ni Rep. Pulong Duterte nga iya kini nga kabtangan, nga gipasabot nga wala pay titulo o Transfer Certificate of Title ang maong propiedad.
Gipanghimakak usab ni Matibag ang mga alegasyon nga ang ilang imbestigasyon batok sa pamilyang Duterte usa ka “trial by publicity.”
Gikanayon niya nga ebidensiya ang basihan sa ilang imbestigasyon ug ang ilang mga lakang may kalabotan sa interes sa publiko.
Samtang, giklaro sa NBI director nga dili ang Casas Con Vistas Resort ang ilang gipasabot nga propiedad, kondili ang yuta nga tupad niini nga giingong gipanag-iya ni Rep. Pulong Duterte.
Matod ni Matibag, iyang gikatingalahan kon nganong mibati nga nadamay ang maong resort, nga ang gihisgotan lamang sa imbestigasyon mao ang kasikbit nga propiedad nga nalambigit sa kongresista.
