Padayon ang Department of Transportation (DOTr) ug Light Rail Transit Authority (LRTA) sa pagpangita og mga paagi aron makatigom og pondo alang sa pagpalit og dugang nga mga tren sa Light Rail Transit Line 2 (LRT-2).
Apan tungod kay mokabat pa og tulo ka tuig o labaw pa ayha moabot ang mga bag-ong tren, nangita ang DOTr og alternatibong mga paagi aron mahapsay ang linya sa mga pasahero sa matag estasyon.
Sumala sa DOTr, walo lamang ka tren ang kasamtangang naglihok tungod kay ang usa ka tren gipailalom pa sa pag-upgrade sa Train Operating Control Panel, samtang ang usa pa giayo gihapon.
Isip temporaryong solusyon samtang naghulat sa pondo alang sa bag-ong mga tren, gimandoan ni Transportation Secretary Banoy Lopez ang Land Transportation Franchising and Regulatory Board (LTFRB) ug LRTA nga tun-an pag-ayo ang pag-isyu og mga espesyal nga permiso alang sa mga Public Utility Bus aron makahatag og alternatibong sakyanan sa mga pasahero.
Matod ni Lopez, padayon ang ilang pagpangita og pondo alang sa dugang nga mga tren ug pag-upgrade sa ubang mga tren sa LRT-2.
Dugang pa sa kalihukan, nangita usab sila og ubang paagi aron mamenosan ang taas nga linya sa mga estasyon ug matabangan ang mga komyuter samtang gipaayo ang serbisyo sa tren.
Tumong sa maong lakang nga makahatag og alternatibong sakyanan sa mga komyuter ug mamenosan ang paghuot sa mga pasahero sa mga estasyon sa LRT-2, ilabina panahon sa pinakadaghang biyahe sa buntag ug hapon.
| via Bombo Ray Ann Martinez
