Ginapaaresto na sa Makati Regional Trial Court si Batangas 1st District Representative Leandro Leviste tungod sa kasong giingong paglapas sa probisyon sa Public Service Act.
Nakapagawas na ang korte og warrant of arrest batok kang Leviste, diin gitakda usab ang piyansa sa ₱72,000.
Sumala kang National Bureau of Investigation o NBI Director Melvin Matibag, makigkoordinar dayon ang mga otoridad sa Bureau of Immigration aron masuta ang opisyal nga kahimtang ug kinaroroonan sa kongresista alang sa pagpatuman sa warrant.
Ang kataposang impormasyon nag-ingon nga didto sa France si Leviste uban sa iyang inahan nga si Senadora Loren Legarda, nga anaa didto alang sa pagpa-checkup ug pag-atiman sa iyang panglawas.
Samtang, gipaabot usab ang opisyal nga pahayag gikan sa kampo ni Leviste bahin sa ilang legal nga lakang aron tubagon ang mando sa korte.
Padayon usab nga gibantayan sa NBI ang pagbiyahe pasulod ug paggawas sa nasod sa kongresista aron masiguro ang hustong pagserbisyo sa warrant of arrest sa iyang pagbalik sa Pilipinas.
Sa pagkakaron, padayon ang pagpatuman sa proseso sa mga otoridad subay sa mando sa Makati RTC.
