Abli sa posibilidad si Senator Panfilo “Ping” Lacson sa pagbalik ni Senadora Loren Legarda sa Senate majority.
Kini ang gipahayag ni Lacson atol sa usa ka ambush interview sa Senado karong adlawa, Oktubre 5, 2026.
Matud ni Lacson, miangkon si Legarda kaniadto nga nasayop siya sa iyang desisyon nga mouban sa grupo nga gipangulohan ni Senate Minority Leader Alan Peter Cayetano human sa pagbag-o sa liderato sa Senado kaniadtong Mayo 11, 2026.
Gipasabot ni Lacson nga iyang gisultihan si Legarda nga kalimtan na ang maong panghitabo tungod kay nahuman na kini.
Dugang pa niya, nasubo siya kaniadto sa desisyon sa senadora nga mibiya sa ilang grupo nga kaniadto kabahin sa Sotto-led minority ug mipili nga mouban sa Cayetano bloc nga wala man lang sila pahibaloa daan.
Apan sa pagkakaron, abli ang majority sa posibleng pagbalik ni Legarda apan mag-agad gihapon sa kaugalingong desisyon sa senadora, samtang padayon pa ang paghisgot sa pipila ka miyembro sa majority bahin niini.
Sa miaging pahayag, wala usab gisalikway sa spokesperson ni Legarda nga Atty. Tony La Viña ang posibilidad nga mobalik ang senadora sa majority bloc, ilabina tungod sa kasagarang pagbag-o sa mga alyansa sulod sa Senado.
