Gihatagan og dugang panahon ang defense team ni Vice President Sara Duterte aron maandam ang ilang pag-atubang sa testimonya ni AMLC Executive Director Ronel Buenaventura.
Nangayo og dugang panahon si defense lead counsel Sheila Sison human nadawat lamang sa ilang grupo kaniadtong Huwebes, Oktubre 1, 2026 ang mga summary sa AMLC records nga ilang gikinahanglang tun-an.
Gibanabana nga mokabat sa 23 hangtod 24 ka kahon sa mga dokumento ang kinahanglan nilang susihon sa dili pa maandam alang sa direct ug cross-examination sa testigo.
Matud ni Sison, importante nga masusi pag-ayo ang mga rekord aron matubag nila ang mga pangutana sa prosecution ug maihanda ang mga angay nga objections atol sa pagdungog.
Gitugotan ni Senate Impeachment Court Presiding Officer Francis “Chiz” Escudero ang hangyo sa depensa alang sa dugang panahon sa pagpangandam.
Tungod niini, sa Oktubre 5, 2026 na ipadayon ang testimonya ni Buenaventura, samtang giusog sa mas mosunod nga mga petsa ang pag-atubang sa mga representante sa mga kompanya sa insurance, mga bangko ug Bureau of Internal Revenue o BIR.
Gipangutana usab sa depensa ang pagmarka sa mga AMLC records isip “strictly confidential,” ug gipasikad niini ang confidentiality provisions ubos sa Anti-Money Laundering Act.
Pagpasabot ni Escudero nga mahimong hisgutan sa mga senator-judge ang maong isyu atol sa caucus o sa open session sa pagpadayon sa impeachment trial sa Lunes.
