Andam makigpulong si Department of the Interior and Local Government Secretary Jonvic Remulla sa grupong True Brown Style o TBS, apan ubos sa kondisyon nga undangan una sa grupo ang ilang giingong pagkalambigit sa mga krimen.
Matud ni Remulla, lisod papason ang negatibong impresyon batok sa TBS tungod sa mga rekord ug insidente nga giingong nalambigit sa ilang mga miyembro sa nagkalain-laing komunidad.
Gipunting sa DILG nga giimbestigahan usab ang giingong recruitment ug grooming sa mga menor de edad ngadto sa ilegal nga mga kalihokan. Lakip sa mga alegasyon ang pag-apil sa mga batan-on sa mga gitawag nga initiation rites ug uban pang criminal activities.
Sumala sa mga otoridad, naa na usab sa ilang kamot ang listahan sa mga miyembro sa TBS isip kabahin sa monitoring ug imbestigasyon sa grupo.
Gipahayag ni Remulla ang maong posisyon human mihimakak ang TBS sa mga pasangil nga nalambigit sila sa pagpakaylap sa krimen sa Pilipinas. Giingon sa grupo nga dili angay i-generalize ang tanan nilang miyembro isip mga kriminal, tungod kay aduna usab kanila nga mga propesyonal, trabahante, ginikanan, ug mga negosyante.
Padayon nga gisusi sa mga otoridad ang mga alegasyon batok sa TBS ug ang ilang organisasyonal nga estruktura aron matino ang tinuod nga papel sa mga miyembro nga nalambigit sa mga insidente.
