Posibleng mapuslan pag-usab ang old landfill sa New Carmen, Davao City isip “waste-to-resources” site, imbis nga padayon nga mangita og bag-ong lugar alang sa landfill sa siyudad. Gibutyag ni Davao City Councilor Temojin “Tek” Ocampo, chairperson sa Committee on Environment and Natural Resources, nga adunay grupo gikan sa Malaysia nga nagtanyag og proposal alang sa maong proyekto atol sa Pulong-Pulong sa Sangguniang Panlungsod.
Lakip sa gisugyot ang pagkalot sa natipon nga basura sulod sa old landfill ug pagbulag sa mga materyales nga mahimo pang ma-recycle ug magamit pag-usab sama sa plastik, rubber ug uban pang klase sa basura.Gitan-aw usab ang posibilidad nga ang ubang makuhang basura iproseso aron mahimong refuse-derived fuel o RDF, isip kabahin sa konsepto sa circular economy diin ang basura mahimong mahimong kapanguhaan imbis nga ilabay lamang.
Sumala ni Ocampo, kung mapahimuslan ug mahurot ang mga natipon nga basura sa old landfill, posible nga magamit pag-usab ang maong lugar ug mapakunhod ang panginahanglan sa pagpangita og bag-ong landfill site.Dugang pa, gawas sa maong proposal gikan sa Malaysia, adunay usab plano alang sa Waste-to-Energy o WTE project nga gitanyag gikan sa Japan.
Samtang, gipatin-aw ni Ocampo nga dili sayon ang pagtukod og bag-ong landfill sa Districts 2 ug 3 tungod sa higpit nga mga kinahanglanon alang sa maong pasilidad.
Gikinahanglan usab nga susihon pag-ayo ang lokasyon tungod kay adunay mga agricultural ug protected areas nga mahimong maapektuhan sa operasyon sa landfill.
Gipasidan-an niya nga mahimong maapektuhan ang komunidad ug palibot pinaagi sa contamination kung dili angay ang mapiling lugar, mao nga ang bag-ong landfill sa siyudad gipahimutang kilid sa old landfill sa New Carmen.
Tungod niini, gipunting ni Ocampo nga mas angay nga tutukan ang episyenteng solid waste management ug ang mga pamaagi nga makapahimo sa basura nga magamit pag-usab.Gipaklaro usab sa konsehal nga proposal pa lamang ang waste-to-resources project ug kinahanglan pa kini og pagtugot gikan sa City Government of Davao ug sa mga may kalabotan nga konseho.
Kinahanglan usab nga masunod ang mga regulasyon sa Environmental Management Bureau o EMB sa Department of Environment and Natural Resources o DENR sa dili pa kini mahimong ipatuman.
Sa pagkakaron, padayon ang paghisgot sa mga posibleng teknolohiya ug pamaagi aron mas mapauswag ang pagdumala sa basura sa Davao City ug mapuslan pa ang mga basura nga natipon sulod sa old landfill.
