Gipahimangnoan sa City Traffic and Transport Management Office o CTTMO ang mga pasahero sa DC Bus nga mosunod sa mga lagda aron mapadayon ang libre ug hapsay nga serbisyo.
Gibutyag ni CTTMO Chief Atty. Tristan Dwight Domingo nga adunay mga pasahero nga gi-ban na sa pagsakay tungod sa pagpabadlong ug dili pagsunod sa mga patakaran.
Lakip sa mahimong hinungdan sa pag-ban ang paghugaw sulod sa bus, pagpatong sa tiil sa lingkoranan ug uban pang binuhatan nga makasamok o makalapas sa lagda.
Matud ni Domingo, adunay usa ka insidente diin nireklamo ang usa ka inahan human gibadlong ang iyang anak tungod sa pagsaba-saba sulod sa bus.
Tungod niini, nangayo og dispensa si Domingo ug gipasabot nga kabahin sa ilang responsibilidad ang pagpatuman sa mga lagda aron mapadayon ang kahapsay sa pagsakay.
Dugang pa niya, dili angay padak-on ang mga insidente kon adunay pasahero nga badlungon, ug mas maayong sundon ang mga patakaran aron malikayan ang panaglalis.
Samtang, padayon ang CTTMO sa pagmonitor sa mga pasahero ug pagpatuman sa mga lagda.
Sa pagkakaron, ang pagpahimangno sa mga pasahero nga tahuron ang mga patakaran aron makapadayon sa paggamit sa serbisyo. | VIA BOMBO EROS PAJOTA
