Mas gipakusgan pa sa National Capital Region Police Office ang pagbantay sa mga dapit nga gilauman nga sentro sa mga protesta karong Setyembre 21, 2026 atol sa ika-54 nga anibersaryo sa deklarasyon sa Martial Law.
Subay sa pagpanguna ni NCRPO Officer-in-Charge Brig. Gen. Christopher Abrahano,una na silang nagpahigayon og walkthrough ug ocular inspection kaniadtong Setyembre 18 aron masusi ang mga ruta ug critical areas nga mahimong agianan o tapokanan sa mga demonstrador.
Lakip sa gisusi ang Mendiola, J.P. Laurel Street, Ayala Bridge, mga dapit duol sa TIP Manila, San Sebastian Church ug University of the East, ingon man ang EDSA Shrine ug People Power Monument sa Quezon City.
Naka-full alert ang NCRPO sukad pa niadtong Setyembre 18, samtang giandam ang kapin 17,000 ka pulis alang sa mga kalihukan sa Metro Manila. Apil sa deployment ang crowd management ug augmentation forces.
Gipahinumdoman ni Brig. Gen. Abrahano ang mga pulis nga respetuhon ang katungod sa mga pundok ug magpakita og maximum tolerance.
Wala pay namonitor nga partikular nga security threat, apan padayon ang pag-validate sa impormasyon ug koordinasyon sa mga organizer.
Gipahimutang usab ang traffic ug crowd control measures aron mapadayon ang kaluwasan sa publiko ug normal nga dagan sa Metro Manila.
