Gipahibalo sa European Commission ang plano nga limitahan ang access sa social media sa mga menor de edad nga nag edad sa 15 paubos isip lakang sa pagpalig-on sa online safety.
Ubos sa EU Kids Act, ipatuman ang usa ka “gradual approach” alang sa mga menor de edad nga mogamit sa social media. Gitugotan ang mga edad 13 hangtod 15 nga maka-access sa social media platforms pinaagi sa “mini accounts” nga kontrolado usab sa uban sa ilang guardian.
Sumala sa European Commission, gikinahanglan usab nga mapamatud-an sa mga social media company nga “safe by design” ang ilang mga platform aron mapanalipdan ang mga bata ug kabatan-onan.
Dugang pa niini, mahimong moabot sa unom ka porsyento ang multa batok sa mga social media platform nga mapakyas sa pagsunod sa mga lagda.
Ubos sa maong sugyot, ang mga menor de edad nga 15 anyos pataas lamang ang mahimong makapahimutang og kaugalingong social media account.
Lakip sa posibleng maapektuhan sa maong lagda ang mga sikat nga social media application sama sa TikTok, Instagram ug Snapchat, ingon man ang YouTube, AI chatbots ug online games.
Gikinahanglan usab sa mga social media company nga mosumite og detalyadong child safety plans isip kabahin sa mga lakang alang sa pagpanalipod sa mga menor de edad online.
Sa pagkakaron, plano pa lamang kini sa European Commission ug nagpadayon ang proseso alang sa dugang nga diskusyon ug pag-apruba sa maong mga lagda
