Gibarugan sa Bureau of Jail Management and Penology o BJMP nga walay espesyal nga pagtratar kang kanhing House Speaker ug presidential cousin nga si Rep. Martin Romualdez bisan pa man sa iyang taas nga posisyon sa gobyerno.
Giinsistir sa ahensiya nga parehas ra ang pagtratar kang Romualdez ug sa ubang mga opisyal nga anaa sa kustodiya, subay sa mga lagda nga ipatuman sa tanang persons deprived of liberty o PDL.
Gipasabot ni BJMP spokesperson Superintendent Jayrex Bustinera nga parehas ra ang mga pribilehiyo ug serbisyo nga madawat sa ordinaryong mga piniriso ug sa mga opisyal nga anaa sa kustodiya.
Lakip niini ang visitation privilege, pagkaon, pag-atiman sa panglawas, pag-atubang sa mga hearing ug uban pang panginahanglan samtang anaa sa kustodiya.
Dugang pa niini, ipailalom gihapon sa security check ang mga pagkaon nga dad-on sa mga bisita alang kang Romualdez, sama sa pamaagi nga gisunod sa mga pagkaon nga ihatag sa ubang mga piniriso.
Gipatin-aw usab ni Bustinera nga ang dugang nga seguridad sa palibot sa detention facility maoy bugtong kalainan sa pagdumala kang Romualdez ug sa ubang high-profile inmates.
Sumala pa niya, dili kini espesyal nga pagtratar kondili lakang sa pagdumala sa mga risgo nga kauban sa mga high-profile inmate, lakip na ang posibleng pagsulay sa pag-ikyas o pagpangluwas kanila.
Sa pagkakaron, gipadayon sa BJMP ang pagpatuman sa parehas nga mga lagda sa serbisyo ug pagtratar sa tanang PDL, samtang gi-adjust ang seguridad base sa risgo nga giatubang sa matag high-profile inmate.
