Gihagit ni Philippine Sports Commission o PSC Chairman Patrick Gregorio ang mga atleta sa nasud nga molabaw sa ilang nahimo sa miaging 2022 Hangzhou Asian Games sa ilang pagsabak sa 20th Asian Games sa Aichi-Nagoya, Japan.

Gipahayag ni Gregorio nga kung malabwan sa delegasyon sa Pilipinas ang medalya nga ilang nakuha sa 2022 Hangzhou Asian Games, siya mismo ang makig-estorya sa PSC Commissioners alang sa dugang nga insentibo alang sa tibuok delegasyon.

Wala usab gipadayag niini, kung unsa ang mahimong dugang nga insentibo alang sa mga atleta kung malabwan nila ang medalya nga nakuha sa 2022 Hangzhou Asian Games.

Kahinumduman nga nakakuha ang Pilipinas og upat ka bulawang medalya sa 2022 Asian Games, samtang napulo ka bulawang medalya ang nakuha sa mga para-athletes.Giklaro usab ni Gregorio nga lahi pa sa gitakda sa balaod ang iyang planong dugang nga reward alang sa mga atleta.

Subay sa balaod, makadawat og P2 milyon nga cash incentive ang matag Pilipinong atleta nga makakuha og bulawang medalya sa international events, samtang P1 milyon alang sa silver ug P400,000 alang sa bronze medal.

Atol sa send-off ceremony alang sa mga atleta, gipahibalo usab ni Gregorio ang dugang nga P6,000 nga allowance alang sa mga miyembro sa delegasyon.

Magpadala ang Pilipinas og 464 ka mga atleta nga makigkompetensiya sa 38 ka sports, nga mao ang ikaduhang pinakadakong delegasyon sa nasud sukad sa 1994 Hiroshima Asian Games.

Sugod ang kampanya sa Pilipinas pinaagi sa 5×5 basketball diin mag-atubang ang nasudnong koponan batok sa Bahrain.

Pormal nga magsugod ang 20th Asian Games sa Septiyembre 19 ug molungtad hangtod Oktubre 4 sa Aichi-Nagoya, Japan.