Gipakusog sa Department of Social Welfare and Development o DSWD Field Office XI ang field monitoring sa Pantawid Pamilyang Pilipino Program o 4Ps beneficiaries sa pipila ka barangay sa Agdao ug Marilog Districts sa Davao City.
Gipangunahan sa Davao City Regional Composite Team ang monitoring nga nagtutok sa duha ka concern sa 4Ps households: ang dili regular nga pagtambong sa Family Development Sessions o FDS ug mga kabataang giila nga Not Attending School o NAS.
Imbes magsalig lamang sa monitoring records, direktang nakig-istorya ang team sa mga pamilya, community leaders, schools ug ubang stakeholders aron masabtan ang mga rason sa ilang kahimtang.
Lakip sa gihimo ang home visits, Key Informant Interviews, Focus Group Discussions ug barangay station visits.
Gibisitahan usab sa team ang Marilog National High School of Agriculture aron i-validate ang impormasyon sa mga 4Ps-monitored children nga wala naga-eskwela.
Gilauman nga gamiton ang nakolektang impormasyon aron matino ang implementation gaps ug angay nga interventions.
Gipasiugda sa DSWD XI nga tumong sa monitoring nga masabtan ang aktuwal nga kahimtang sa mga pamilya ug makahatag og mas angay nga suporta sa mga benepisyaryo.| VIA BOMBO EROS PAJOTA
