Nagpasidaan pag-usab ang environmental group nga Ban Toxics batok sa mga substandard ug posibleng delikadong Christmas lights ug dekorasyon nga nagkadaghan sa merkado karong pagsugod sa “Ber” months.
Sumala ni Thony Dizon, Advocacy and Campaign Officer sa Ban Toxics, importante nga susihon sa mga consumers ang label, product information ug safety markings sa dili pa mopalit og dekorasyon.
Gipunting niya ang substandard nga Christmas lights nga mahimong mo-overheat ug posibleng hinungdan sa sunog sa mga panimalay.
Pasidaan usab sa publiko nga dili lamang presyo ug design ang basihan sa pagpili, kondili pangitaon ang Import Commodity Clearance o ICC sticker ug ubang angay nga product standard markings.
Likayan ang pag palit og mga produkto nga dili klaro ang gigikanan o adunay materials nga mahimong makadaot sa panglawas ug kalikupan.
Bisan sa gagmay o barato nga tindahan mopalit, kinahanglan gihapon nga susihon sa label, kondisyon ug safety information sa produkto.
Tumong sa maong pahimangno nga malikayan ang sunog, aksidente ug health risks atol sa holiday season.
